ගනේගොඩ දෙවියෝ සීතාවක කේන්ද්‍ර කරගත් තුන්කෝරළය හා සියනෑ කොරලයේ වන්දනාවට ලක්වන ප්‍රාදේශීය දෙවි කෙනෙකි. ජනප්‍රවාදයට අනූව ගනේගොඩ නමින් දේවත්වයට පත් වූවේ සීතාවක අසහාය රණ ශූරයා වූ ටිකිරි බංඩාර රාජසිංහ රජතුමාය. ගනේගොඩ දෙවියන්ගේ උප්පත්ති කථාව  ” ගනේගොඩ පුවත” හා ” ගනේ යාදින්න” මගින් විස්තර වේ. ගනේ ගොඩ දෙවියෝ මුලින් යක්ෂයෙකි. මෙම යක්ෂයා කෝට්ටේ රජතුමා වූ බුවනෙකබා රජතුමාගේ දේවියට ආවේශ විය. කොතරම් ප්‍රථිකාර කලද සුව නොවීය.  භික්ෂූන් වහන්සේ නමක් පිරිත් කියා පිරිත් නූල් බැඳ දේවිය සුවපත් කලේය. ඉන් පසු යක්ෂයා සීතාවක මයාදුන්නේ රජ දේවියට ආවේශ විය. ඇයටද බුවනෙකබා රජදේවිය සුවපත්කල භික්ෂූන් වහන්සේ පැමින පිරිත් කියා පිරිත් නූල් බැඳ සුවපත් කලේය.
යක්ෂයා භික්ෂූන් වහන්සේලා කෙරෙහි වෛර බැඳ ගත්තේය. දු‍ටු දු‍ටු තැන සංඝයා වහන්සේලා විනාශ කරන බවට දිවුරුවේය. රජදේවිය සුවපත් වුවත් යක්ෂයා බිසවගේ කුසයේ පිලිසිඳ ගත්තේය. යක්ෂ මායම නිසාම කුඩා අවදියේ පටන්ම ටිකිරි කුමරු සතුව අසහාය බලයක් හිමිවිය. රාජත්වයට පත්වූ පසි භික්ෂූන් වහන්සේලාට හිංසා පීඩා කල බවත් මරනින් මතු දේවත්වයට පත්විය. මාපිටිගම, අටලුගම හා මංගෙදර මුල්ලේ කෝවිල අසල හිඳ තම බලය පෙන්වා පුදපඩුරු  ලැබූ බව කියවේ. මීරිගම ගනේගොඩ බොකලගම විහාරයේ පිහිටි ගනේගොඩ දේවාලය ගනේ ගොඩ දෙවියන් ජීවමානව වැඩ වාසය කරන බවත් කෙම්මුර දිනවලදී විහාරය අසල ඇති ඉඹුල්ගසේ සිට දේවත එලියක් විහාරයට වැඩම කරන බවත් ප්‍රදේශවාසීන් පවසති. රාජසිංහ රජතුමා කුඩාකල මෙම ප්‍රදේශයේ වාසය කල බවත් ගනේගොඩ විහාරයට ගම් බිම් පූජා කලබවත් එනිසා එතුමා දේවත්වයාට් පැමින මෙම ප්‍රදේශයට වැඩිය බව විස්වාසයක් පවතී. මැදගොඩ සිද්ධ, ගනේඩොඩ දොලහ පත්තිනි දේවාලයේද කබුලුමුල්ල පත්තිනි දේවාලයේද ගනේගොඩ දෙවියන් වෙනුවෙන් පුදපූජාවන් පවත්වන අතර දේව යාතිකාවේ පලමුව ගනේගොඩ දෙවියන් සිහිපත් කර පිංදීම කරනු ලැබේ.